وطنطن

حمار

كل من يشارك فى هذة التميثلية الهزلية المسماة بمجلسى الشعب والشورى والاحزاب

حمار

كل من يظن انة بامكانة تغيير شيئ فى البلد دى بدون موافقة الحاكم والحكومة

حمار

كل من يظن انة يمكن ان تتحول مصر الى دولة حرة مسقلة نظيفة

افتكروا معاية مرة واحدة المعارضة غيرت شيئ او منعت قانون سيئ او وقفت امام حاكم فى اى قرار اكثر ما تسطيع اى معارضة حتى لو كانت قوية زى الاخوان انها تعمل مظاهرة وتجعجع شوية فى ميدات التحرير ومع اول عصاية ( مش رصاصة ) من عسكرى امن مركزى يجروا ....هاتقولى وانت عملت اية ما انت زيهم ...هاقولك يا سيدى ... انا دورت على حزب محترم علشان انتمى لية وابقى معارض وشوية الحركات دى مالقيتش واتحداك تقولى على حزب او حركة يكون فيها أمل .... كلها حركات بايخة ...فقررت انى أكون معارض من جواية يعنى مع نفسى زى الاغلبية كلنا معارضين لكن بدون صوت ويمكن تلاقى والله ناس فى الحزب الوطنى معارضين برضة لكن مع نفسهم زينا ومرضتش اكون حمار واشارك فى تمثيلية المعارضة

شوف الزمن الاغبر ..........كنت على القهوة من كام يوم

كان جالس على الترابيزة اللى بجوارى انا واصحابى ثلاثة رجال عندهم من 55 الى 60 سنة

(من عمر ابوك واكتر يعنى )

سمعت واحد بيقول للتانى

>> شوف يا محمود طول ما الواحد قادر يقف فى طابور العيش ساعة واتنين

وطول ما الواحد قادر على زحمة المواصلات والوقوف على المحطات

يبقى نحمد ربنا

شوفتوا الايمان

شوفتوا الرضا والقناعة

شوفتوا البهدلة اللى الناس عيشاها فى وطننا (قصدى فى وطنهم)

واللة العظيم كنت ها عيط لكن لولا اصحابى اللى كانوا معاية يفتكروا انى حنين ولا حاجة ولا عندى شفقة ورحمة

ما هى الحاجات دى اصبحت من العيوب

ماحدش حاسس بالناس الغلابة

نفى السيد/ تامر جمال مبارك

ما يتردد مؤخرا فى بعض صحف المعارضة من انة يسعى الى وراثة حكم والدة السيد الرئيس جمال مبارك

قامت السيدة الفاضلة خديجة مبارك بافتتاح مهرجان اللعب على الجميع للسنة العاشرة على التوالى

صرح السيد / هيثم أحمد عز بأن انتخابات الحزب الوطنى هذا العام لم تشهدها مصر منذ 40 عاما مضت

ومن أخبا البرلمان :

قام الدكتور وائل فتحى سرور رئيس مجلس الشعب

وبحضور الدكتور حمادة صفوت الشريف

رئيسا مجلسى الشعب والشورى برفع الحصانة البرلمانية عن العضو هشام ايمن نور

وذلك لما بدر منة من اساءة للسيد اللواء محبوب حبيب العادلى وذلك اثناء زيارتة لوالدة ايمن نور فى سجن ليمان طرة

ومن أخبار الاقتصاد:

اجتمع مجلس الوزراء أمس وذلك لمناقشة بيع الهرم منقرع الباقى من الاهرامات الثلاث وذلك لمستثمر رئيسى شريطة ان يحافظ على العمالة المكونة من خفير حراسة وعامل النظافة

انا عن ازمة مياة الشرب فى محافظة كفر الشيخ:

فقد افاد مندوبنا ان الازمة قد انتهت تماما بوفاة جميع سكان المحافظة ....وفاة طبيعية

حد يقدر يقوللى اية هو الوطن؟

هاساعدك واديلك خيارات

الوطن هو الشوارع المكسرة والبيوت اللى من غير مية ولا نور

ولا الوطن هو الذمم الخربانة والفساد المنشر من القمة الى القاع

ولا الوطن هو مجموعة من الاكابر متحكمين فينا ومشغلين عندهم 70 مليون بنى ادم

ولا الوطن هو اهلى واصحابى وبيتى والباقى مالوش لازمة

ولا الوطن هو اللى بيتباع حتة حتة ومش باقى منة غير الهرم والنيل وبكرة يتباعو

ولا الوطن هو الشعب المطحون اللى بيجرى ورا لقمة وقعت من وليمة الكبار وهايفضل طول عمرة يجرى لغاية ماينقطع نفسة

حد يقوللى اية هو الوطن علشان عايز احبة ومش عارف ؟

حد يقولى الوطن مات ولا لسة عايش؟